Комиссияи олии аттестатсионии назди Президенти Ҷумҳурии Тоҷикистон ба диққати довталабони дараҷаҳо ва унвонҳои илмӣ мерасонад, ки зимни мониторинги маҷаллаҳои тақризшаванда муайян гардид, ки шумораи №4.2 (43) соли 2024 “Паёми молия ва иқтисоди Тоҷикистон”-и Донишгоҳи молия ва иқтисоди Тоҷикистон дар муҳлати муқарраршуда таҳия, нашр ва дар сомонаи расмии Elibrary ҷойгир нагардида, баъди нашри шумораи №1 (44) соли 2025 мақолаҳои илмӣ барои чоп қабул шуда истодааст, ки хилофи талаботи ҷорӣ мебошад.
Аз ин лиҳоз, бо мақсади пешгирии баҳсҳои соҳавӣ аз муроҷиат барои чопи мақола дар шумораи №4.2 (43) соли 2024 маҷаллаи мазкур ва дигар шумораҳои маҷаллаҳои тақризшавандаи муҳлати нашрашон гузашта, худдорӣ намоянд.
Хотиррасон менамоем, ки тибқи тартиби муқарраршуда маҷаллаҳои илмии тақризшаванда шуруъ аз моҳи апрел барои нашри шумораи №2 мақолаҳои илмӣ қабул намуда истодаанд.
Барои пешгирии нофаҳмиҳо ва гирифтани маълумоти зарурӣ ба муҳаққиқон тавсия дода мешавад, ки аз сомонаи Комиссия (бахши “Маҷаллаҳои тақризшаванда”) истифода баранд.
