Комиссияи олии аттестатсионии назди Президенти Ҷумҳурии Тоҷикистон тибқи Нақшаи тасдиқшудаи хонишҳои идоравӣ санаи 29 августи соли 2025, соати 10-00 дар толори Комиссия бо иштироки намояндаи сардори шуъбаи Маркази миллии қонунгузории назди Президенти Ҷумҳурии Тоҷикистон Шоназаров Содиқ Ашурович хониши идоравиро дар мавзуи “Омӯзиш ва татбиқи Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” баргузор намуд.
Ҷамъомади мазкурро муовини раиси Комиссия Муъмин Шарифзода оғоз намуда, аҳли толорро бо рӯзномаи хониши идоравӣ шинос намуда, вобаста ба муҳтаво ва амалисозии Қонуни мазкур дар Комиссия ба таври фишурда маълумот доданд ва суханро барои андешаронӣ ба сардори шуъбаи Маркази миллии қонунгузории назди Президенти Ҷумҳурии Тоҷикистон Шоназаров Содиқ Ашурович доданд.
Мавсуф, ба таври васеъ ва ҳаматарафа дар бораи қонунгузориҳо ва санадҳои меъёрии ҳуқуқии баӣналмилалӣ ва Ҷумҳурии Тоҷикистон, ки ҳифзу ҳимояи ҳуқуқи кӯдакон, таълиму тарбияи онҳо бахшида шудаанд, инчунин оид ба мазмуну мундариҷаи Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” андешаронӣ намуданд.
Аз ҷумла, дар бораи сабабу омилҳои дар таҳрири нав таҳия ва қабул гардидани Қонуни мазкур, яъне содаву оммафаҳм ва ба таври васею фарогир танзим намудани муносибатҳо, ҷавобгӯ ба талаботи замон, мушаххасу мукаммал намудани салоҳият ва ваколатҳои мақомоти давлатӣ ҷиҳати идоракунии давлатӣ, шарҳу тавзеҳи дурусти истилоҳоти ҳуқуқӣ, аз байн бурдани носаҳеҳӣ, танзими роҳу василаҳои нави таълиму тарбияи кӯдак, ба таври мукаммалу васеъ пешбинӣ намудани ҳуқуқу уҳдадориҳои субъектҳое, ки ба таълиму тарбияи кӯдак машғуланд, тақвияти масъулияти падару модар ва шахсони онҳоро ивазкунанда, бо мақсади таълиму тарбияи кӯдак дар руҳияи инсондӯстӣ, ифтихори ватандорӣ, эҳтиром ба арзишҳои миллӣ, умумибашарӣ ва фарҳангӣ, таъсис ва таҳкими фаъолияти комиссияҳои ҷамъиятӣ, мақомоти ҳокимияти давлатӣ, худидоракунии шаҳрак ва деҳот ва мақомоти худфаъолияти ҷамъиятӣ, яъне кори дастаҷамъона ва фарогир будани таълиму тарбияи кӯдак ба ҳамаи субъектҳои муносибатҳои ҷамъиятӣ ва навгониҳои Қонун ва сохтори он, яъне пайдо шудани моддаҳои нав, зарурияти ивази ном ва васеъ намудани мавзуи танзими қонун ба таври муфассал маълумот доданд.
Дар охир саволу ҷавоб миёни кормандони Комиссия ва намояндаи Маркази миллии қонунгузории назди Президенти Ҷумҳурии Тоҷикистон доир гардид. Инчунин, кормандони Коррупсия оид ба муҳтавои Қонуни мазкур баромад карда, фикру ақидаи худро иброз намуданд. кормандон ба саволҳои худ посухҳои асоснок гирифтанд.
Чорабинии мазкурро муовини раиси Комиссия Муъмин Шарифзода ҷамъбаст карда, оид ба иштироки се ниҳоди муҳимми Ҷумҳурии Тоҷикистон иҷтимоӣ — оила, муассисаи таълимӣ ва ҷомеа дар таълиму тарбияи кӯдак андешаронӣ намуданд.
